شعر کوردی کڵهڕی

◾️

هسارەگەێ.

هسارەگەێ شەو پووش کەو، وەێ مڵکە دی باێە بایدنەو!
بێە لا زڵفەیل  هۊل لۊل، هەر ت مەنیدە دی لە خەو!

تەنیا هسارەێ شەو منی، لێود بشارەو لە خەنێ!
چەود بشارەو لە کەشەو، بوەس وە پاگەد پا بەنێ!

قمشی نیەکەم بۊشم بچوو، لێوا مە بوو لێوا مە بوو؟
خۆەد دی بچوو لە شار شەو، دڵ جی کەنێ کەم تا وە سوو

یە تەرف تۊنێگ ها دڵم، پام ڕێ نیەکەێ تا مەنزڵم
هیشتمە جی کیەنی لە نۊر، وە کی بێەم چەپەێ گۆڵم؟!

ناوقەێ هناسم گردێە، ئەسرەیل نامەی گردێە
دی کەس نیەڕەسێدن وە پاێ، ئمرێ ک زانم مردێە

لەێ ئاسمان هەفتمە، مەنزڵ وە مەنزڵ کەفتمە
ئێ کەشکەشانە شاهدە، لەێ ساڵە هەر نەخەفتمە

وە هەڵکە دەو وەتم نەچوو، فرەو نەکە داخەیل کوو
تەنیا کەسێ ک مەن لە لام، هە باێە قۆشۊ قوو لە قوو

هەێ ئەور بوار م ئاگرم، دێرم مرم، دێرم مرم!
گووشەێ لە شەۊ واڵد گرم، تا بوومە بەور دڵ هەڵگرم.

#سمیە_صفری 

@kalherr

◾️ هەرکەسێ لایق نیە هەێ دڵ ک ئێڵخانی بکەێ

چەرخ گەردون تا ئەبەد ناوێ وە نیک نامی بوەێ

گەر بچەمیەێدن کۊەیل گێشتێ لە داخ ئێ خەمە

یەێ زەڕە دەرد لە دڵ هیچ دەردەدارێگ نیەوەێ

#حمزە_شیرزادی

@kalherr ◾️